A pig or a dog?

CC老師：小朋友，今日英文句子寫A pig has a fig.
小朋友：你畫出嚟吖！
CC老師：唔畫啦！你地笑我畫豬好似隻狗嘅！
小朋友：畫喇！我地唔笑喇！
CC老師：好喇！畫塊面先，畫個鼻先，畫埋對耳先……
小朋友：哎呀，慢慢就似一隻狗呀，點解嘅？
CC老師：哈哈，我都話唔畫喇！

愛你

三歲小男生，坐着沒事幹，等候下一個活動環節。突然……
男孩A：我愛你！(情深款款)
男孩B：我唔愛你！(面露不屑)
男孩A：我愛你！(繼續情深款款)
男孩B：我唔愛你！(繼續面露不屑)
男孩A：我好愛你！(仍然情深款款)
男孩B：我唔愛你！(仍然面露不屑)
男孩A：我愛你！(堅持情深款款)
男孩B：我唔愛你！(堅持不屑)
來來回回二十多次……
Madam Shirley：你唔愛佢咩？
男孩B：唔愛！
Madam Shirley：唔好唔愛喇！愛佢喇！
男孩B：咁好喇！

掛住……

小朋友：「CC老師，我想告幾日假。」
CC老師：「點解嘅？」
小朋友：「我好攰，想休息幾日。」
CC老師：「吓？咩咁攰？你唔鍾意返嚟同小朋友玩咩？」
小朋友：「鍾意，但係我真係好攰！」
CC老師：「唔可以呀，你唔返學，我會掛住你架，唔可以告假！」
******
小朋友媽媽：「佢今日有啲唔舒服，我叫佢唔好返學，佢喊！」
CC老師：「點解呀？」
小朋友媽媽：「佢話唔返學，CC老師會掛住佢！」
******
小朋友：「我想返學。」
CC老師：「但係聽日開始放假嘞！」
小朋友：「我成日唔返學，就會掛住你！」
******
小朋友：「點解喺我食飯之前你唔返嚟？」
Madam Shirley：「我平時都係你食飯先返喇！」
小朋友：「你尋日好耐都唔返！」
Madam Shirley：「哦！你話我上星期無返？」
小朋友：「尋日上次，我見唔到你好掛住你！」
******
原來，有人「掛住」，又可以「掛住」人，也是一種幸福。如果，我真的離開你們，我會好「掛住」，每一天、每一夜。

蕃茄成熟時

蕃茄成熟時，你們笑了！
蕃茄成熟時，你們驚叫！
蕃茄成熟時，你們爭相摸一摸！
你們說：
「蕃茄「凍冰冰」」
「蕃茄像個橙」
「蕃茄可以吃的嗎？」
看見生命在你們手中，快樂得像進了天國。長大後，也要為生命驚嘆，像六歲的時候。